ជាមួយនឹងចក្ខុវិស័យធ្វើឱ្យកាន់តែប្រសើរនូវការអប់រំ មុខរបរ និងបរិយាបន្នសង្គមសម្រាប់ជនមានពិការភាពដែលមិនអាចអានឯកសារបោះពុម្ពជាទូទៅបាន ចាប់តាំងពីឆ្នាំ ២០១៤ មក យូអិនឌីភី បានផ្តល់នូវការគាំទ្របច្ចេកទេស ដើម្បីបង្កើនការយល់ដឹងអំពីគ្រោះទុរភិក្សសៀវភៅ អភិវឌ្ឍន៍សមត្ថភាពរបស់ប្រទេសនានា ដើម្បីផ្តល់សច្ចាប័ន និងអនុវត្តសន្ធិសញ្ញាម៉ារ៉ាកេស និងផ្តល់ជាព័ត៌មានសម្រាប់ធ្វើការកែទម្រង់ផ្នែកច្បាប់ ដោយធ្វើការសហការជាមួយរដ្ឋាភិបាល និងសហគមន៍ពិការភាព។ យូអិនឌីភី បានទទួលជោគជ័យក្នុងការជួយឱ្យប្រទេសថៃ និងឥណ្ឌូនេស៊ី ​ចូលរួមក្នុងសន្ធិសញ្ញាម៉ារ៉ាកេសកាលពីឆ្នាំ ២០១៩ និង ២០២០។ បច្ចុប្បន្ននេះ យូអិនឌីភី កំពុងផ្តល់ការគាំទ្របច្ចេកទេសដល់ប្រទេសកម្ពុជា និងវៀតណាម។ កាលពីពេលថ្មីៗនេះ ប្រទេសអាស៊ានទាំងពីរនេះបានខិតខំគួរឱ្យកត់សម្គាល់ ដើម្បីផ្តល់ការសម្របសម្រួលឱ្យកាន់តែប្រសើរដល់ជនមានពិការភាពដែលមិនអាច​អានឯកសារបោះពុម្ពជាទូទៅបាន។

       នៅឆ្នាំនេះ ប្រទេសវៀតណាមបានសម្រេចនូវសមិទ្ធផលដ៏ធំមួយឆ្ពោះទៅចូលជាសមាជិកនៃសន្ធិសញ្ញាម៉ារ៉ាកេស។ កាលពីខែមិថុនា ឆ្នាំ២០២២ រដ្ឋសភារបស់ប្រទេសវៀតណាមបានអនុម័តលើការធ្វើវិសោធនកម្មច្បាប់ស្តីពី កម្មសិទ្ធិបញ្ញា (IP)។ ច្បាប់កម្មសិទ្ធិបញ្ញាថ្មីនេះ បញ្ចូលបញ្ញត្តិសំខាន់ៗនៃសន្ធិសញ្ញាម៉ារ៉ាកេស ដែលផ្តល់លទ្ធភាព និងជួយសម្រួលដល់ការរៀបចំ ការចែកចាយ និងការផ្តោះប្តូរឆ្លងដែននូវស្នាដៃបោះពុម្ពផ្សាយក្នុងទម្រង់ដែលប្រកបដោយផាសុកវត្ថុដល់ជនមានពិការភាព។ ការចូលជាសមាជិកនៃសន្ធិសញ្ញាម៉ារ៉ាកេសរបស់ប្រទេសវៀតណាម ក៏ត្រូវបានពន្លឿនផងដែរ នៅពេលដែលប្រធានាធិបតីប្រទេសនេះ ចុះហត្ថលេខាលើសំណើររបស់ប្រទេសវៀតណាម កាលពីថ្ងៃទី១ ខែវិច្ឆិកា ដើម្បីដាក់ជូនទៅអង្គការកម្មសិទ្ធិបញ្ញាពិភពលោក ទីភ្នាក់ងារសហប្រជាជាតិ និងស្ថាប័នដែលទទួលខុសត្រូវត្រួតពិនិត្យលើការអនុវត្តសន្ធិសញ្ញាម៉ារ៉ាកេស។

       ដើម្បីជួយដល់ដំណើរការកែទម្រង់ផ្នែកច្បាប់នៅក្នុងប្រទេសវៀតណាម យូអិនឌីភី​ បានផ្តល់នូវការគាំទ្របច្ចេកទេសជាច្រើន។ ការគាំទ្រទាំងនេះ រួមមានការវិភាគលើច្បាប់កម្មសិទ្ធិបញ្ញាកន្លងមក ការពិនិត្យលើសេចក្តីព្រាងវិសោធនកម្មច្បាប់ និងផ្តល់អនុសាសន៍មួយចំនួន ដើម្បីឱ្យច្បាប់នេះស្របតាមសន្ធិសញ្ញាម៉ារ៉ាកេស។ ការគាំទ្របច្ចេកទេសនេះ ត្រូវបានផ្តល់ដោយអមជាមួយនឹងឱកាសកសាងសមត្ថភាពសម្រាប់មន្ត្រីរដ្ឋាភិបាល សហគមន៍ជនមានពិការភាព និងអ្នកជំនាញផ្នែកច្បាប់។ ខណៈពេលដែលប្រទេសវៀតណាមត្រៀមខ្លួនចូលជាសមាជិកសន្ធិសញ្ញាម៉ារ៉ាកេស បច្ចុប្បន្ន យូអិនឌីភី កំពុងគាំទ្រដល់ការពិនិត្យលើសេចក្តីព្រាងឯកសារគតិយុត្ត សម្រាប់អនុវត្តច្បាប់កម្មសិទ្ធិបញ្ញាថ្មីនេះ ក្នុងនោះមានបញ្ញត្តិលើកលែងការអនុវត្តតាមសិទ្ធិអ្នកនិពន្ធ សម្រាប់ជនមានពិការភាពដែលមិនអាចអានឯកសារបោះពុម្ពជាទូទៅបានផងដែរ។ ​

       កម្ពុជាក៏កំពុងសម្រេចបានវឌ្ឍនភាពផងដែរ៖ សន្ធិសញ្ញាម៉ារ៉ាកេសត្រូវបានបញ្ចូលទៅក្នុងសេចក្តីព្រាងច្បាប់ ដើម្បីធ្វើវិសោធនកម្មច្បាប់ស្តីពីសិទ្ធិអ្នកនិពន្ធនិងសិទ្ធិប្រហាក់ប្រហែលរបស់ប្រទេសនេះ។ សេចក្តីព្រាងច្បាប់នេះ មានបញ្ញត្តិស្របតាមសន្ធិសញ្ញាម៉ារ៉ាកេស ហើយបច្ចុប្បន្នកំពុងពិនិត្យដោយក្រសួងវប្បធម៌ និងវិចិត្រសិល្បៈ។ ការអនុម័តលើឯកសារវិសោធនកម្មនេះ នឹងនាំកម្ពុជាឱ្យទៅកាន់តែកៀកនឹងការផ្តល់សច្ចាប័នលើសន្ធិសញ្ញាម៉ារ៉ាកេស។​

       យូអិនឌីភី បំពេញតួនាទីយ៉ាងសំខាន់ក្នុងការជំរុញឱ្យមានការដាក់បញ្ចូលសន្ធិសញ្ញាម៉ារ៉ាកេសទៅក្នុងសេចក្តីព្រាងច្បាប់នេះ ក៏ដូចជាទៅក្នុងផែនការយុទ្ធសាស្ត្រជាតិស្តីពីពិការភាព ២០១៩-២០២៣ របស់កម្ពុជា។ យូអិនឌីភី​ នឹងបន្តផ្តល់ការគាំទ្រដល់ការផ្តល់សច្ចាប័ន និងការអនុវត្តសន្ធិសញ្ញានេះ ដូចជា តាមរយៈការបង្កើតក្រុមការងារបច្ចេកទេសទទួលបន្ទុកសន្ធិសញ្ញាម៉ារ៉ាកេស ​ដែលចូលរួមសម្របសម្រួលដោយក្រសួងវប្បធម៌ និងវិចិត្រសិល្បៈ ដែលជាស្ថាប័នទទួលខុសត្រូវ លើការអនុវត្តច្បាប់សិទ្ធិអ្នកនិពន្ធ និងក្រុមប្រឹក្សាសកម្មភាពជនពិការ ដែលជាស្ថាប័នបង្គោលទទួលបន្ទុកកិច្ចការពិការភាពរបស់ប្រទេសនេះ។

       ទិវាអន្តរជាតិស្តីពីជនមានពិការភាព ក៏ក្រើនរំលឹកយើងទាំងអស់គ្នាផងដែរថា នៅមានការងារជាច្រើនទៀត ដែលចាំបាច់ត្រូវធ្វើ ដើម្បីបញ្ចប់គ្រោះទុរភិក្សសៀវភៅ និងដើម្បីសម្រេចឱ្យបាននូវសង្គមមួយដែលមានសមធម៌ បរិយាបន្ន និងយុត្តិធម៌ ដែលជាចក្ខុវិស័យនៅក្នុងរបៀបវារៈឆ្នាំ ២០៣០ ដើម្បីការអភិវឌ្ឍប្រកបដោយចីរភាព។

អត្ថបទដោយ៖

• ដាវ ធូហ័ង (Dao Thu Huong) នៃ យូអិនឌីភី ប្រចាំប្រទេសវៀតណាម
• មាស​ ម៉ៅ នៃ យូអិនឌីភី ប្រចាំកម្ពុជា
• ខាស៊ូយូគី អ៊ូជី (Kazuyuki Uji) នៃ យូអិនឌីភី ប្រចាំតំបន់អាស៊ីប៉ាស៊ីហ្វិក

សម្រាប់ព័ត៌មានបន្ថែមអំពីសន្ធិសញ្ញាម៉ារ៉ាកេស សូមទាញយកសៀវភៅស្តីពីសន្ធិសញ្ញាម៉ារ៉ាកេស ដែលបោះពុម្ពផ្សាយដោយក្រសួងវប្បធម៌ និងវិចិត្រសិល្បៈ (ជាភាសាខ្មែរ) នៅទីនេះ។