Avropa İttifaqı (Aİ) və Birləşmiş Millətlər Təşkilatının İnkişaf Proqramı (BMTİP) sosial çətinliklərə innovativ biznes həlləri yaratmağa kömək etmək məqsədilə İdeyalaşdırma Təlim Düşərgəsinə başlayıb.

Təlim düşərgəsi Aİ tərəfindən maliyyələşdirilən vətəndaş cəmiyyəti təşkilatları ilə iş layihəsi çərçivəsində həyata keçirilib və Ağdam, Bakı, Biləsuvar, Gəncə, Goranbay, Göyçay, Qazax, Qusar, Lənkəran, Masallı, Mingəçevir, Neftçala, Şəki, Şəmkir və Zaqatala şəhərlərindən 70-ə qədər sosial sahibkarı, sosial yönümlü biznesi və vətəndaş cəmiyyəti təşkilatını bir araya gətirib. Təlim düşərgəsinin iştirakçıları maliyyə toplama platformalarından tutmuş yerli inkişafla məşğul olan və həssas icmalarla işləyən VCT-lərə qədər müxtəlif fəaliyyət sahələrini təmsil edirlər. İdeyalaşdırma təlim düşərgəsinin əsas məqsədi yaradıcı düşüncəni təşviq etmək, eləcə də gəlir gətirən və Dayanıqlı İnkişaf Məqsədlərində (DİM) əks olunmuş məsələlərin həllinə kömək edən innovativ biznes ideyaları yaratmaqdır.

İştirakçılar sosial sahibkarlıq sahəsində qlobal təcrübələr və sosial problemlərin həllinə yönələn bizneslərin qurulması barəsində öyrəniblər. Seminarlar layihənin daha öncə baş tutan Təlimçilərin Təlimi proqramını bitirmiş təlimçilər də daxil olmaqla, beynəlxalq və yerli ekspertlərdən ibarət multidissiplinar komanda tərəfindən aparılıb.

Təlim düşərgəsinin iştirakçıları sahibkarlıq yanaşması vasitəsilə sosial təsir yaratmaq istiqamətində biliklərini təkmilləşdirib, şəbəkələrini inkişaf etdirmək və DİM-lər istiqamətində birgə çalışmaq imkanı əldə ediblər.

Bu təlim düşərgəsindən seçilmiş ideyalar layihənin növbəti inkubasiya və akselerasiya proqramına vəsiqə qazanacaq və həmin mərhələdə ən yaxşı biznes planları müvafiq maliyyə dəstəyi ala biləcək.

***

İdeyalaşdırma düşərgəsi, Aİ-nin maliyyələşdirdiyi və BMTİP-nin həyata keçirdiyi “Azərbaycanda innovasiya əsaslı və dayanıqlı vətəndaş cəmiyyətinin inkişafı” layihəsi tərəfindən həyata keçirilir. 
Layihə - siyasətlərin formalaşdırılması, yerli inkişafa dəstək, ölkədə sosial sahibkarlığın təşviqi sahələrində VCT-lərin iştirakının artırılması məqsədilə onların potensialının gücləndirilməsini hədəfləyir. 

Əlaqə üçün məlumat:

Leyla Qurbanova, BMTİP-nin Azərbaycan ofisinin Kommunikasiyalar üzrə mütəxəssisi – leyla.gurbanova@undp.org 

Gülnarə Bayramova, Avropa İttifaqının Azərbaycan Nümayəndəliyinin Mətbuat və İnformasiya Rəhbəri gulnara.bayramova@eeas.europa.eu

Avropa İttifaqı öz nou-hausunu, resurslarını və amallarını tədricən birləşdirmək qərarına gəlmiş 27 üzv dövlətdən ibarətdir. 60 ildən artıq genişlənmə müddəti ərzində, onlar, birgə olaraq, mədəni müxtəlifliyi, tolerantlığı və fərdi azadlıqları qoruyub saxlayaraq, sabitlik, demokratiya və dayanıqlı inkişaf zonasını yaradıblar. Avropa İttifaqı öz sərhədlərindən kənarda digər ölkə və xalqlarla öz nailiyyətlərini və dəyərlərini paylaşmağa sadiq olan tərəfdir.

BMT-nin İnkişaf Proqramı BMT-nin aparıcı agentliyi olub, yoxsulluq, bərabərsizlik və iqlim dəyişikliyi ilə mübarizə aparmaqdadır. Biz, 170 ölkədə müxtəlif mütəxəssis və tərəfdaşlarımızdan ibarət geniş şəbəkəmizlə birgə fəaliyyət göstərərək, planet və insanlar üçün hərtərəfli və dayanıqlı həllər üzərində çalışırıq.

Ətraflı məlumat üçün undp.org vebsaytına baş çəkə yaxud Twitter-də @UNDP səhifəsini izləyə bilərsiniz.