LocationsBMT Taraqqiyot Dasturi (UNDP) Yevropa Ittifoqi va Fransiya Taraqqiyot Agentligi bilan O‘zbekiston hukumatiga yashil obligatsiyalar ta’sirini monitoring qilishda ko‘maklashadi
2-August, 2024
2024-yilning 30-31-iyul kunlari BMT Taraqqiyot Dasturi (UNDP) va O‘zbekiston Respublikasi Iqtisodiyot va moliya vazirligi bilan birgalikda milliy hamkorlarning yashil obligatsiyalar mablag‘larini taqsimlash, ta’sirini monitoring qilish, shuningdek, hisobot berish bo‘yicha bilim va ko‘nikmalarini oshirishga qaratilgan ikki kunlik seminar o‘tkazdi. Ushbu seminar BMT Taraqqiyot Dasturining O‘zbekiston hukumati bilan Yevropa Ittifoqi tomonidan Fransiya taraqqiyot agentligi (AFD) orqali moliyalashtiriladigan “O‘zbekistonda yashil rivojlanishni moliyalashtirishni qo‘llab-quvvatlash” bo‘yicha yangi qo‘shma tashabbusining bir qismi bo‘ldi.
Tadbirda O‘zbekiston Respublikasi Iqtisodiyot va moliya vazirligi, xususan, G‘aznachilik xizmati qo‘mitasi va uning hududiy bo‘limlari, Qishloq xo‘jaligi vazirligi, Suv xo‘jaligi vazirligi, Ekologiya, atrof-muhitni muhofaza qilish va iqlim o‘zgarishi vazirligi, “O‘zsuvtaminot” aksiyadorlik jamiyati va boshqa tegishli tashkilotlardan 50 dan ortiq vakillar ishtirok etishdi.
2023-yil oktyabr oyida O‘zbekiston Londondagi fond birjasida 4,25 trillion so‘mlik birinchi yashil suveren yevroobligatsiyalarini chiqardi va shu bilan "yashil" taraqqiyot va iqtisodiyotga o‘tish yo‘lida qat’iy sodiqligini namoyish etdi. Yashil obligatsiyalar chiqarilishi AQSh, Buyuk Britaniya, Yevropa Ittifoqi, Osiyo, Yaqin Sharq va Shimoliy Afrika kabi hududlardan 30 dan ortiq xalqaro investorlarning qiziqishini jalb qildi. Investorlar O‘zbekistonning yashil iqtisodiyotga o‘tish, energetika sektorini liberallashtirish, davlat korxonalarini xususiylashtirish va Jahon savdo tashkilotiga a’zo bo‘lish orqali savdoni erkinlashtirish kabi davom etayotgan islohotlarini olqishladilar.
Seminarning asosiy maqsadi ishtirokchilarni “yashil” obligatsiyalar tamoyillari, tartibga solish doirasi va organlari, xalqaro standartlar, mablag‘larni taqsimlash jarayonlari, ularni monitoring qilish va ma’lumotlarni yig‘ish usullari bilan tanishtirishdan iborat bo‘ldi. Seminar jarayonida BMT Taraqqiyot Dasturi (UNDP) ning xalqaro va mahalliy ekspertlar jamoasi ushbu mavzularda taqdimotlar o‘tkazdi va guruh muhokamalarini olib bordilar.
Maxsus sessiya 2021-yil iyul oyida O‘zbekiston tomonidan chiqarilgan Barqaror Rivojlanish Maqsadlari (BRM) obligatsiyalari bo‘yicha ta’sirini monitoring qilish va hisobot berish jarayonida hukumat duch kelgan asosiy muammolar va o‘rganilgan ko‘nikmalarga qaratildi.
“O‘zbekistonda yashil rivojlanishni moliyalashtirishni qo‘llab-quvvatlash” yangi qo‘shma tashabbusi BMT Taraqqiyot Dasturi (UNDP) hamda Yevropa Ittifoqi (YI) tomonidan Fransiya Taraqqiyot Agentligi (FTA) orqali moliyalashtiriladi. Ushbu tashabbus O‘zbekiston hukumatiga mamlakatning “yashil” ustuvorliklari va maqsadlariga erishish uchun potensial moliyalashtirish manbalarini aniqlash va baholash, integratsiyalashgan yondashuvni yaratishda yordam berishni, yashil byudjetlashtirish metodologiyalarini to‘liq joriy etish orqali byudjet jarayoniga yashil omillarni yanada kengroq tadbiq etishni, shuningdek, davlat moliyasidan samarali foydalanish va yangi innovatsion moliyalashtirish vositalarini sinovdan o‘tkazish hamda joriy etishda ko‘maklashishni maqsad qilgan.
