Қазақстандағы Біріккен Ұлттар Ұйымының Даму бағдарламасы (БҰҰДБ) бүгін цифрлық шешімдерге тең қолжетімділікті қамтамасыз етуге және микро, шағын және орта кәсіпорындарды (ШОБ) жаңа технологияларға бейімдеуге бағытталған жаңа жобаны бастады. Жоба Корея Республикасын цифрландыру саласындағы инновациялық тәжірибелер мен құралдарды басқа елдерге, соның ішінде Қазақстанға таратуға бағытталған БҰҰДБ Сеул саясат орталығының флагмандық бастамасы – Орнықты даму мақсаттары саласындағы (ОДМ) серіктестік бағдарламасының бөлігі болып табылады.

2023 жылы басталған ОДМ серіктестік бағдарламасы «Инклюзивті цифрлық трансформация арқылы ШОБ-ты қолдау» серіктес елдерге жастар және әйелдер басқаратын ШОБ сияқты осал экономикалық субъектілерді қолдау тәжірибесімен бөлісу арқылы инклюзивті цифрлық бизнес трансформациясына қол жеткізуде қолдау көрсетеді. Бағдарлама Корея Республикасының Шағын бизнес және нарықтық қызметтер (SEMAS) тәжірибесіне негізделген серіктес елдің тиісті даму мақсаттарына қол жеткізуге үлес қосу үшін әзірленген.

Қазақстанда ОДМ серіктестік бағдарламасының мақсаты: а) цифрлық дағдылар бойынша онлайн курстар үшін оқу жоспарын әзірлеу б) халықтың осал топтары үшін тренерлерді даярлау бағдарламасын жүзеге асыру және в) Қызылорда облысындағы шағын және орта бизнес субъектілеріне олардың білімін, оның ішінде деректерді талдау және шешім қабылдау салаларында сандық дағдыларын, арттыру арқылы қолдау көрсету үшін «Болашақ форумын» ұйымдастыру. 

ШОБ дамыған және дамушы елдердегі жалпы жеке сектордың маңызды бөлігін құрайды. Қазақстанда 2023 жылғы қаңтардағы жағдай бойынша 4,1 миллионнан астам адамды (ел халқының 20 пайызы) жұмыспен қамтамасыз ететін 2,026,527 ШОБ субъектісі тіркелді.

Дегенмен, ШОБ субъектілерінің электрондық коммерцияға қатысуын және цифрлық қаржылық қызметтерге қолжетімділігін жақсарта алатын цифрлық технологияларды қабылдауда артта қалғаны анық.

Инклюзивті цифрлық трансформация цифрлық шешімдерге тең қолжетімділікті қамтамасыз етуді және ШОБ иелерінің жаңа технологияларға бейімделу үшін тиісті дағдыларын дамытуды талап етеді. Қазақстан өз бизнесін жүргізетін әйелдер мен жастардың цифрлық дағдыларын бірлесіп ілгерілету үшін ағымдағы жылы серіктес ел ретінде таңдалды.

Бүгін өткен таныстыру семинарында Корея мен Қазақстанның негізгі серіктестері мен мүдделі тараптары ұсынылды. Тараптар Бағдарламаны іске асырудың мақсаттары мен жоспарларын, сондай-ақ кәріс тарапы ұсынған қазақстандық контекстке неғұрлым сәйкес келетін қолайлы шешімдер мен құралдарды талқылады.